«Барселона» ҳужумчиси Лионель Месси Европа чемпионлар лигасининг чорак финал босқичида «Манчестер Юнайтед»га қарши бўлиб ўтган ўйинда (1:0) бурнидан жароҳат олган эди.
Баҳснинг 30-дақиқасида "МЮ" ҳимоячиси Крис Смоллинг ҳаводаги тўп учун курашда Мессининг юзига қўли билан зарба бериб юборди. Шундан сўнг аргентиналик футболчининг бурни қонади ва унга тиббий ёрдам кўрсатилди.
Лионель бугун тиббий кўрикдан ўтди ва унинг юз қисмида жиддий жароҳат йўқлиги аниқланди. Шу боис, у «Уэска»га қарши кечадиган Ла лига баҳсида майдонга тушишга тайёр. Аммо Эрнесто Вальверде шанба кунги ўйинда аргентиналик футболчига дам бериши мумкин.