Суперлиганинг 4-туридан жой олган “Локомотив” — АГМК ўйини “темирйўлчилар”нинг уй аренасида 14 апрель куни бўлиб ўтиши керак эди.
Тошкентга юқори мартабали меҳмонларнинг ташрифи муносабати билан “Локомотив” футбол клуби мазкур беллашувни ТТМИ стадионига кўчиришни сўраб, ЎзПФЛга мурожаат билан чиқди. Вазият ўрганиб чиқилиб, “Локомотив” футбол клубининг таклифи қаноатлантирилди. Ўйин аввал белгилангани каби 18:20 да эмас, балки 16:45 да старт олади. Сабаби ТТМИ стадиони майсаси талабга жавоб берса-да, ёритиш тизими ҳақида бундай фикр билдириб бўлмайди.
Учрашув якшанба куни бўлиб ўтиши инобатга олинса, стадион ва вақтнинг бир неча дақиқага ўзгараётгани футбол мухлисларига ноқулайлик туғдирмайди. ЎзПФЛ футбол мухлисларидан юқоридаги ҳолатни тўғри тушунишларини сўрайди.
Айни вақтда Суперлига ўйинларини трансляция қилаётган “Спорт” бу каби масалаларни камида бир ҳафта аввал режалаштириши инобатга олинса, мураккаблик айнан телеканал билан боғлиқ бўлиши мумкин. “Спорт” 16:15 да старт оладиган “Сурхон” — “Пахтакор” ҳамда 18:20 да бошланадиган “Локомотив” — АГМК ўйинини жонли кўрсатишни режалаштирганди. Юқоридаги ҳолат телеканал режаларининг ўзгаришига сабаб бўлади.
