Тошкент шаҳар “Ватанпарвар” ташкилоти ҳудудларда спортнинг техник ва амалий турларини оммалаштириш, ёшларда ҳарбий ватанпарварлик руҳини янада ривожлантиришга қаратилган янги лойиҳа ва спорт мусобақаларини ўтказиб келмоқда.
Ўзбекистон Республикаси Президентининг 2018 йил 12 декабрдаги “Ёшларни ватанпарварлик руҳида ва жисмоний тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги қарори ижросини таъминлаш борасида тизимли ишлар қилинмоқда. Ташкилотнинг ҳудудий кенгашлари йил давомида “Биз ватанпарварлармиз” шиори билан спорт мусобақаларини тизимли равишда ташкил қилиб, турли кўргазмали тадбирларда ёшлар фаоллигини оширишга алоҳида эътибор қаратмоқда.
Жумладан, Тошкент шаҳар “Ватанпарвар” ташкилотининг Миробод ўқув спорт техника клуби ташаббуси билан Республика техника ва амалий спорт турлари марказида ўқ отиш бўйича Тошкент шахар очиқ биринчилиги ўтказилди.
Мусобақада “Ватанпарвар” ташкилотининг Тошкент шаҳридаги барча туманлари ва бошқа спорт клубларидан 9 жамоа ўзаро беллашди.
– Беллашувларда жамоамиз юқори натижа қайд этганидан хурсандман, – дейди “Республика техник ва амалий спорт турлари маркази” клуби аъзоси Суннатилло Аҳмедов. – Янги дўстлар орттирдик. Муҳими машғулотларда ўрганган билимларимизни синовдан ўтказик. Ушбу спорт тури инсонга диққатни жамлаш, сабрли бўлишни ўргатади. Шуғулланаётганимга кўп бўлмаган бўлса ҳам устозларим эришаётган натижаларимдан хурсанд.
Мусобақа якунига кўра, 1-ўринни “Республика техник ва амалий спорт турлари маркази” жамоаси эгаллади. 2-ўринни Миробод, 3-ўринни эса Учтепа жамоаси ёшлари қўлга киритди.
