Германиянинг «Хоффенхайм» клубида тўп сураётган Кот-д'Ивуарлик вингер Базуман Туре фаолиятини туманли Альбионда давом эттириши мумкин.

Africafoot журналистларининг берган маълумотларига кўра, «Манчестер Юнайтед» клуби 20 ёшли ҳужумкор ярим ҳимоячи билан шартнома имзолашга қизиқиш билдирмоқда. Африкалик футболчининг бозор қиймати 40 миллион еврони ташкил этади, унинг амалдаги меҳнат шартномаси эса 2029 йилнинг ёзига қадар мўлжалланган.

Аввалроқ матбуотда «Ливерпуль» клуби ҳам Базуманга қизиқаётгани ҳақида хабарлар тарқалган эди. Якунланган мавсумда Туре «Хоффенхайм» сафида 32 та учрашувда майдонга тушди. Вингер ўз ҳисобига 5 та гол ва 12 та голли узатмани ёздириб қўйишга муваффақ бўлди.