Бугун, 13 май куни Жисмоний тарбия ва спорт вазирлигида бир гуруҳ спорт фахрийларига “Меҳнат фахрийси” кўкрак-нишонлари топширилишига бағишланган тадбир бўлиб ўтди.
9 май – Хотира ва қадрлаш куни муносабати билан ушбу кўкрак нишонлари билан тақдирланганлар қаторида спорт соҳаси фахрийлари ҳам бор.
Кўкрак нишонларини эгаларига топширган жисмоний тарбия ва спорт вазирининг биринчи ўринбосари Ойбек Қосимов спорт фахрийларини мукофотлар билан қутлар экан, уларга юртимизда жисмоний тарбия ва спортни ривожлантириш ва оммаллаштириш йўлидаги саъй-ҳаракатлари учун миннатдорчилик билдирди.
Енгил атлетика бўйича Республика олий спорт маҳорати мактаби мураббийлари Озод Рўзметов, Алим Ахмеджанов ҳамда Ўзбекистон спорт ташкилотлари фахрийлари Кенгаши раиси Комилжон Худойбергановга I даражали “Меҳнат фахрийси”кўкрак нишони топширилди.
Шунингдек, Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва малакасини ошириш маркази кафедра мудири Махмуд Ахматов, спорт ўйинлари бўйича Республика олий спорт маҳорати мактабининг баскетбол бўйича мураббийи Степан Лебедев ҳамда Спорт яккакурашлари бўйича Республика олий спорт маҳорати мактабининг бокс бўйича мураббийи Нажиб Арлановга II даражали “Меҳнат фахрийси”кўкрак нишони топширилди.
Маълумот учун, I, II ва III-даражали “Меҳнат фахрийси” кўкрак нишони Ўзбекистон Республикаси Президентининг 2016 йил 28 декабрдаги “Ўзбекистон фахрийларни ижтимоий қўллаб-қувватлаш “Нуроний” жамғармаси фаолиятини янада такомиллаштириш чора-тадбирлари тўғрисида”ги Фармонига асосан мамлакатимизнинг иқтисодиёт, ишлаб чиқариш, илм-фан, маданият, таълим, соғлиқни сақлаш ва бошқа соҳаларида кўп йиллар давомида ҳалол ва самарали меҳнат қилган шунингдек, фарзандларимизни жамият олдида масъулият, миллий ва умуминсоний қадриятларга, катталарга ва ёш авлод вакилларига ҳурмат, она-Ватанга муҳаббат, истиқлол ғояларига садоқат руҳида тарбиялаш ишларига бағишлаб, жамиятимизда ҳурмат қозонган нафақа ёшидаги юртдошларимизни, муносиб тақдирлаш мақсадида таъсис этилган.
