"Пахтакор" Осиё чемпионлар лигасининг гуруҳ босқичининг сўнгги турида қийин ўйин ўтказди. Шота Арваладзе шогирдлари Жидда шаҳрида "Ал-Аҳли" клуби меҳмони бўлиб, имкониятни бой берди.

Ваҳоланки, тошкентликлар ўзлари учун керак бўлган — дурангга эришишга жуда яқин туришганди. Учрашувнинг дастлабки дақиқаларини вакилларимиз жуда яхши ўтказиб, бир нечта хавфли ҳужумлар ташкил этишди. Аммо футболчиларимиз улардан фойдалана олишмади.

Тайм ўрталарига келиб саудияликлар аста-секин ташаббусни қўлга ола бошладилар. Иккинчи бўлимда эса тўлиқ устунлик "Ал-Аҳли" томонида бўлди. Баҳснинг 69-дақиқасида Умар ас-Сома қанотдан етказилган узатмани бош билан Қувватов дарвозасига жойлаб қўйди.

"Пахтакор" эса вазиятни ўнглаш учун ҳужумлар ташкил қила бошлади. Ўйиннинг асосий вақти тугашига 2 дақиқа қолганида Черан узатиб берган тўпни Сергеев бўш қолган дарвозага жойлаб, ҳисобни тенглаштирди.

Ўйиннинг асосий вақтига 4 дақиқа қўшиб берилди. Ана шу дақиқалар ўтиб бораётганида Абдулраҳмон Ғариб жарима майдончаси ташқарисидан аниқ зарба йўллади ва жамоасига ғалабани тақдим этди.

Натижада "Пахтакор" 8 очко билан "D" гуруҳида 3-ўринда қолиб кетди. "Ал-Аҳли" эса 9 очко билан плей-оффга йўл олди.

ОЧЛ, "D" гуруҳи, 3-тур
"Ал Аҳли" - "Пахтакор" - 2:1 (0:0)
Голлар: Умар ас-Сома (69), Абдулраҳмон Ғариб (90+2) — Игорь Сергеев (88)
"Ал-Аҳли": Муҳаммад Овайс, Муҳаммад Фатил, Пауло Диаз, Абдуллоҳ Тармин, Абдулбосит Ҳинди, Адерлан Сантос, Юсуф Ҳарби, Салман Мувашар, Абдулфаттоҳ Асири, Хорхе Семедо, Умар ас-Сома
Захира: Босим Солиҳ, Тайсир Жассим, Нуҳ Иброҳим, Айман Алҳулайф, Абдулраҳмон Ғариб, Ҳани Исмоил, Омар Сирож
"Пахтакор": Қувватов, Сайфиев, Кримец (с), Аъзамов, Алижонов, Ҳамробеков, Собирхўжаев, Машарипов, Черан, Ҳамдамов, Бикмаев
Захира: Суюнов, Комилов, Аҳмадов, Сергеев, Козак, Синдаров, Симич