"Реал" бош мураббийи Зайниддин Зидан жамоасининг ёзги ўқув-машғулот йиғини ўтадиган жойини ўзгартиришга қарор қилди. Янги режага кўра, "Мадрид" дастлабки йиғинни АҚШда эмас, Канаданинг Монреал шаҳрида ўтказади.

"Қироллик клуби" 2016 йилнинг ёзида айнан ушбу шаҳарда тайёргарликни бошлаб, мавсум сўнгида Испания чемпионлиги ва Европа чемпионлар лигасини қўлга киритган эди. Франциялик мутахассис Монреалнинг об-ҳавоси тайёргарлик учун аъло даражада деб ҳисобламоқда.

"Реал" 2017 йилги ёзги тайёргарликни АҚШнинг Лос-Анжелес шаҳрида бошлаган эди. Ўшанда клуб ЕЧЛда ғолиб чиққан бўлса-да, Ла лигада муваффақиятсизликка учраган эди.

Клуб Мадриддаги ўз базасида йиғилади, у ерда 3-4 кунлик машғулотдан кейин футболчилар Канада йўл олишади. Жамоа 8 кун давомида Монреалда шуғулланиб, сўнгра АҚШга йўл олади. "Қироллик клуби" у ерда 3та назорат учрашувини ўтказади: «Бавария», «Арсенал» ва «Атлетико»га қарши.

Шунингдек, «Реал Мадрид» Мюнхен шаҳрида ўтказиладиган Audi Cup мусобақасида иштирок этади. Жамоа ярим финалда «Тоттенхэм» билан тўқнаш келса, орадан 1 кун ўтиб Зидан шогирдларини финал ёки 3-ўрин учун ўйин кутиб турибди.

"Қаймоқранглилар" 1 август куни Мадридга қайтиб, мавсумнинг бошланишига тайёргарликни давом эттиришади. Янги мавсумга қадар клуб яна битта ўртоқлик ўйини ўтказишни режалаштирган.

«Реал»нинг мавсумолди ўйинлари рўйхати:

12 июль — Монреалда ўқув-машғулот йиғини;
21 июль — «Бавария»га қарши ўйин (Хьюстон);
24 июль — «Арсенал»га қарши ўйин (Мэриленд);
27 июль — «Атлетико»га қарши ўйин (Нью-Жерси);
30 июль — «Тоттенхэм»га қарши ўйин (Audio Cup, Мюнхен);
31 июль — финал ёки 3-ўрин учун ўйин (Audio Cup, Мюнхен);
1 август — Мадридга қайтиш