Америка кубогида "С" гуруҳи жамоалари ҳам баҳсларга киришишди. Уругвай терма жамоаси Эквадорга қарши майдонга чиқиб, йирик ҳисобда ғалаба қозонди.

Ўйин дебютидаёқ уругвайлик ҳужумчи Лодейро чиройли гол муаллифига айланди. У қанотдан етказиб берилган узатмани рақиб жарима майдончаси ичида дастлаб кўкраги билан ўзига бўйсундирди, иккинчи уринишда ҳимоячи таъқибидан қочди ва аниқ зарба билан ҳисобни очди.

Учрашувнинг 20-дақиқасида Эквадор ҳимоячиси Кинтеро ҳаводаги тўп учун курашда Лодейронинг юзига тирсак қўйди. Бу вазият учун ҳакам футболчига дастлаб сариқ карточка кўрсатганди. Аммо у видеотакрорларни қайта-қайта томоша қилиб, "сариқ"ни бекор қилиб, Кинтерони тўғридан-тўғри қизил билан "сийлади". Таъкидлаш лозимки, ҳимоячи ушбу вазиятдан бир неча дақиқа олдин ҳам рақиб футболчиларидан бирига тирсак билан шикаст етказишга уринган эди. Аммо дастлабки вазиятни ҳакам беэътибор қолдирган эди.

Рақиб майдонда бир киши кам бўлиб қолганидан кейин Уругвайнинг иши анча осонлашди. Эдинсон Кавани "қайчи" услубида дарвозани забт этган бўлса, биринчи бўлим тугаш арафасида Луис Суарес ҳисобни йирик кўринишга келтириб қўйди.

Баҳс тугашига 12 дақиқа қолганида уругвайликлар яна бир марта рақиб дарвозасини ишғол қилиб, ҳисобнинг 4:0 бўлишини таъминлашди.

Америка кубоги, "С" гуруҳи, 1-тур
Уругвай – Эквадор 4:0 (3:0, 1:0)
Голлар: 1:0 – 6 Лодейро, 2:0 – 33 Кавани, 3:0 – 44 Суарес, 4:0 – 78, автогол Мина.
Уругвай – Муслера, Касерес, Годин, Хименес, Лодейро (Торрейра, 75), Весино (Вальверде, 81), Лаксальт, Нандес (Перейро, 64), Бентанкур, Суарес, Кавани.
Эквадор – Домингес, Ачильер, Мина, Кинтеро, Кайседо, Валенсия, Мена (Веласко, 29), Пресиадо (Ибарра, 46), Орехуэла, Интриаго, Валенсия.
Огоҳлантиришлар: Лодейро (14), Хименес (63).
Четлатиш: Кинтеро (24).