Amerika kubogida "C" guruhi jamoalari ham bahslarga kirishishdi. Urugvay terma jamoasi Ekvadorga qarshi maydonga chiqib, yirik hisobda g‘alaba qozondi.

O‘yin debyutidayoq urugvaylik hujumchi Lodeyro chiroyli gol muallifiga aylandi. U qanotdan yetkazib berilgan uzatmani raqib jarima maydonchasi ichida dastlab ko‘kragi bilan o‘ziga bo‘ysundirdi, ikkinchi urinishda himoyachi ta’qibidan qochdi va aniq zarba bilan hisobni ochdi.

Uchrashuvning 20-daqiqasida Ekvador himoyachisi Kintero havodagi to‘p uchun kurashda Lodeyroning yuziga tirsak qo‘ydi. Bu vaziyat uchun hakam futbolchiga dastlab sariq kartochka ko‘rsatgandi. Ammo u videotakrorlarni qayta-qayta tomosha qilib, "sariq"ni bekor qilib, Kinteroni to‘g‘ridan-to‘g‘ri qizil bilan "siyladi". Ta’kidlash lozimki, himoyachi ushbu vaziyatdan bir necha daqiqa oldin ham raqib futbolchilaridan biriga tirsak bilan shikast yetkazishga uringan edi. Ammo dastlabki vaziyatni hakam bee’tibor qoldirgan edi.

Raqib maydonda bir kishi kam bo‘lib qolganidan keyin Urugvayning ishi ancha osonlashdi. Edinson Kavani "qaychi" uslubida darvozani zabt etgan bo‘lsa, birinchi bo‘lim tugash arafasida Luis Suares hisobni yirik ko‘rinishga keltirib qo‘ydi.

Bahs tugashiga 12 daqiqa qolganida urugvayliklar yana bir marta raqib darvozasini ishg‘ol qilib, hisobning 4:0 bo‘lishini ta’minlashdi.

Amerika kubogi, "S" guruhi, 1-tur
Urugvay – Ekvador 4:0 (3:0, 1:0)
Gollar: 1:0 – 6 Lodeyro, 2:0 – 33 Kavani, 3:0 – 44 Suares, 4:0 – 78, avtogol Mina.
Urugvay – Muslera, Kaseres, Godin, Ximenes, Lodeyro (Torreyra, 75), Vesino (Valverde, 81), Laksalt, Nandes (Pereyro, 64), Bentankur, Suares, Kavani.
Ekvador – Dominges, Achilyer, Mina, Kintero, Kaysedo, Valensiya, Mena (Velasko, 29), Presiado (Ibarra, 46), Orexuela, Intriago, Valensiya.
Ogohlantirishlar: Lodeyro (14), Ximenes (63).
Chetlatish: Kintero (24).