Ҳар жабҳада профессионаллик сари интилаётган Тошкентнинг «Локомотив» клуби бундан буён дунёга машҳур бўлган Германиянинг «AF Sports Reactive» компанияси билан яқиндан ҳамкорлик қилади.

Бугун «Локомотив» стадиони матбуот анжуманлари залида икки томон ўртасида ўзаро ҳамкорлик тўғрисида меморандум имзолашга бағишланган тадбир бўлиб ўтди. Унда «Локомотив» ПФК бош директор ўринбосари Тўлабек Акрамов, жамоа сардори Ислом Тўхтахўжаев, «AF Sports Reactive» компанияси раҳбари, юридик фанлари номзоди Фарид Закиров ва шунингдек бир қатор ОАВ вакиллари иштирок этишди. Тадбирда ҳар икки томон вакиллари ҳам ушбу ҳамкорликнинг ўзаро манфаатли эканини таъкидлашди.


«Локомотив» ПФК бош директор ўринбосари Тўлабек Акрамов «AF Sports Reactive» билан ҳамкорлик «Локомотив» жамоаси ўйинлари тарғиботини янада кучайтириш ҳамда клуб брендини янада кенгроқ ёйиш имконини беришини айтиб ўтди. «AF Sports Reactive» компанияси раҳбари Фарид Закиров эса футбол бўйича Ўзбекистон чемпиони билан яқин алоқалар йўлга қўйилаётганидан жуда мамнун эканини билдирди.

Тадбир якунида ҳар икки томон ўзаро ҳамкорлик хусусида меморандум имзолашди. Унга кўра, эндиликда «AF Sports Reactive» «Локомотив» билан ҳамкорлиги доирасида барча тоифадаги футболчиларга ҳориждан жамоалар қидириш, уларнинг ўртасида воситачи бўлиш, шунингдек, футболчиларнинг ҳуқуқларини юридик томондан ҳимоя қилиш ишлари билан шуғулланади.

Қайд этиш керак, бу компания жаҳонга машҳур бўлган кўплаб топ-жамоалар билан ҳамкорлик қилади. Бу «Локомотив» клубининг олдинга ташлаган қадами деб айтсак бўлади.