Америка кубоги гуруҳ босқичининг 2-тури доирасидаги яна бир қизиқарли ўйин Уругвай ва Япония терма жамоалари ўртасида бўлиб ўтди.

Чилига қарши дастлабки тур баҳсида яхши ўйнаганига қарамай ютқазиб қўйган "самурайлар" бу сафар очко олишга муваффақ бўлишди. Улар уругвайликларга қарши тўқнашувда ўз имкониятларидан самарали фойдаланишди. Ўйиннинг 25-дақиқасида Миеси бир ҳимоячини алдаб ўтди ва ўткир бурчак остида аниқ зарба бериб, ҳисобни очди.

Орадан кўп ўтмасдан ҳакам VAR тизими ёрдамида осиёликлар дарвозаси томон пенальти белгилади. Луис Суарес 11 метрли зарбадан ҳисобни тенглаштирди.

Жанубий америкаликлар танаффусга ҳисобда олдинга чиққан ҳолда йўл олишлари мумкин эди. Аммо олис масофадан йўлланган зарбадан сўнг тўп тўсинга тегиб қайтди. Иккинчи бўлим бошида эса ҳакам Уругвай дарвозаси томон пенальти белгилаши мумкин эди. Аммо у қоидабузарликни эътиборга олмади.

Ўйиннинг 59-дақиқасига келиб японлар чап қанотдан ҳужум ташкил қилишди ва дарвозабон қайтарган тўпни яна ўша Миеси дарвозага жойлаб, жамоасини яна олдинга олиб чиқди.

Орадан 7 дақиқа ўтиб бурчакдан етказилган узатмани Хименес бош билан Япония дарвозасига жойлади ва мувозанатни тиклади.

Шу тариқа, иккинчи турдан сўнг Уругвай 4 очко билан пешқадамга айланган бўлса, Япония 1 очко билан 3-ўринни эгаллаб турибди.

Америка кубоги, "С" гуруҳи, 2-тур
Уругвай – Япония 2:2 (1:1, 1:1)
Голлар: 0:1 – 25 Миеси, 1:1 – 32, пенальти Суарес, 1:2 – 59 Миеси, 2:2 – 66 Хименес.
Уругвай – Муслера, Касерес, Хименес, Годин, Лаксальт (Гонсалес, 28), Нандес (де Арраскаэта, 60), Торрейра, Бентанкур, Лодейро (Вальверде, 73), Суарес, Кавани.
Япония – Кавасима, Ивата (Тацута, 87), Уэда, Томиясу, Сугиока, Миеси (Кубо, 83), Сибасаки, Итакура, Накадзима, Окадзаки, Абе (Уэда, 67).
Огоҳлантиришлар: Уэда (31), Накадзима (78).