Шу йилнинг февраль ойида ЎФА томонидан давралар оралиғидаги трансфер “дарчаси” очилгунга қадар, яъни 9 июлгача футболга оид ҳар қандай фаолиятдан четлатилган "Навбаҳор" ярим ҳимоячиси Азизбек Турғунбоевнинг дисквалификация муддати эртага ўз якунига етади. Эркин агент мақомидаги Турғунбоевнинг 2-даврани “Навбаҳор” таркибида ўтказиши эҳтимоли юқори.

Хабарингиз бор, “лочинлар” эртадан ўқув-машғулот йиғинини Тошкентда бошлашади. Азизбек Турғунбоев катта эҳтимол билан ушбу йиғинга қўшилади.

Ўтган мавсумда “Навбаҳор” етакчисига айланган футболчи борасида тўлиқроқ тўхталадиган бўлсак, Азизбек Турғунбоев 1994 йилнинг 1 октябрида Наманган вилоятининг Поп тумани, Тўда қишлоғида туғилган. Футбол билан 7 ёшидан шуғуллана бошлаган. Миллионлар ўйини сир-асрорларини дастлаб мураббийлар -  Илҳом Абдуқодиров ва Хуршид Йўлдошевдан ўрганган. Ярим ҳимоя чизиғида тўп тепади. 2014 йилдан “Навбаҳор”да. Жамоадаги дебютини 2015 йилги мавсумда ўтказган. Шу кунгача “лочинлар” таркибида 72та ўйинда майдонда 4967 дақиқа ҳаракат қилиб, рақиблар дарвозасига 15та гол урган ҳамда 7та голга ассистентлик қилган. Таъкидлаш жоизки, 15 голдан биттасини пенальтидан урган.

“Навбаҳор” ПФК матбуот хизмати.