Италиянинг Неаполь шаҳрида Бутунжаҳон талабалари ўртасида ўтказилаётган Универсиада-2019 ўйинлари давом этмоқда. Теннисчиларимиз бугун ҳам зафарли юришларини давом эттиришмоқда.

Бугун эркаклар ўртасида яккалик баҳсларида финал йўлланмаси учун кортга тушган Ҳумоюн Султонов франциялик Лукас Поуллаинни 6/0, 6/3 ҳисобида мағлуб этди.

Дастлабки ўйинларда Шри Ланка, Португалия ва Кипр вакилларини йирик ҳисобда мағлуб этган юртдошимиз чорак финалда америкалик Кееган Жамес Смитдан 6/1, 6/2 ҳисобидан устун келган эди.

Ўзбекистоннинг 5-рақамли ракеткаси бўлган ёш умидли теннисчимиз Ҳумоюн Султонов жаҳон рейтингида 380-ўринни эгаллаб турибди.

Эслатиб ўтамиз, кеча Ҳумоюн Султонов ва Санжар Файзиев тандеми ярим финалда хитойликларни мағлуб этиб, универсиаданинг сўнги босқичига чиқишган эди. Бироздан сўнг вакилларимиз финал ўйинида кореялик Сеочан Ҳонг ва Санҳуи Шин жуфтлигига қарши кортга тушишади.

Йигитларимизга ҳал қилувчи баҳсда омад тилаймиз.

Жисмоний тарбия ва спорт вазирлиги

Матбуот хизмати