Айни пайтда "Навбаҳор" Тошкентда 2-давра баҳсларига жиддий тайёргарлик кўрмоқда. Ушбу ўқув-машғулот йиғини доирасида “Навбаҳор” мураббийлари бир қатор янги футболчиларни кўрикдан ўтказишмоқда.

Мураббийлар штабида яхши таассурот қолдирган ўйинчилар билан эса шартнома имзоланмоқда.

Куни кеча 2 нафар футболчи “лочинлар” билан келишувга эришиб, шартномага имзо чекди.

Булар – ярим ҳимоячи Азизбек Турғунбоев ва ҳужумчи Шерзод Ҳакимов.

Азизбек Турғунбоев – 1994 йилнинг 1 октябрида Наманган вилоятининг Поп туманида туғилган. 2015 – 2018 йилларда “Навбаҳор”да тўп тепган. Шу кунгача Турғунбоев "лочинлар" таркибида 72та ўйинда майдонга тушиб, 15та гол урган.

Азизбек жорий йилнинг февралида 2та клуб (“Навбаҳор” ҳамда “Пахтакор”) билан шартнома имзолангани боис, ЎФА томонидан 9 июлгача футболга оид ҳар қандай фаолиятдан четлатилганди.

Дисквалификация муддати якунланганидан сўнг, маҳоратли ярим ҳимоячи наманганликларнинг Тошкентдаги йиғинига қўшилди ва фаолиятини яна қадрдон жамоасида давом эттирадиган бўлди.

Шерзод Ҳакимов – 1987 йилнинг 13 мартида Фарғонада туғилган. 2006-2018 йилларда Фарғонанинг “Нефтчи” клубида ўйнаган. Шунингдек, 2014 йилнинг 1-даврасида “Олмалиқ”да тўп тепган.

Тажрибали ҳужумчи жорий мавсумнинг 1-даврасини Термизнинг “Сурхон” жамоасида ўтказиб. 12та баҳсда майдонга тушиб, 3та гол урган.

Азизбек Турғунбоев ҳамда Шерзод Ҳакимов бу йилги Coca Cola 2-давра баҳсларида “Навбаҳор” шарафини ҳимоя қиладиган бўлишди.

“Навбаҳор” ПФК матбуот хизмати.