Халқаро Футбол Ассоциациялари Кенгаши IFAB март ойидаги йиғилишида жорий йилнинг 1 июнидан бошлаб футбол қоидаларига бир қатор ўзгартиришлар киритилишини маълум қилган эди.

Ушбу қоидалар футболнинг жонли девор, голни нишонлаш, тўпни ўйинга киритиш, қўл билан ўйнаш, ўйинчи алмаштириш, пенальти, баҳсли тўп, мураббийга карточка кўрсатиш каби ҳолатлари бўйича қабул килинган.

Ўзбекистон футбол ассоциацияси ҳамда Профессионал футбол лигаси байроғи остида ўтказиладиган мусобақаларда ҳам ушбу қоидалар жорий мавсумнинг иккинчи даврасидан эътиборан амал қилишни бошлайди. Қоидаларга киритилган ўзгартиришлар бўйича дастлаб миллий чемпионатимиз ва кубок баҳсларида ишлайдиган ҳакам ҳамда назоратчилар, шунингдек, клублар футболчи ва мураббийлари учун семинар ташкил этилди.

Бугун эса миллий чемпионатимизни ёритиб борувчи оммавий ахборот воситалари вакиллари учун ҳам семинар бўлиб ўтди. Унда Спорт ва UzReport телеканаллари шархловчилари, футболни ёритиб борадиган сайт ва газеталар мухбирлари иштирок этишди. Семинар давомида ЎФА Ҳакамлар ва назоратчилар бошқармаси мутахассислари иштирокчиларга қоидаларга киритилган янги ўзгартиришлар хусусида батафсил маълумот беришди. ОФК инструктори Владислав Цейтлин томонидан тайёрланган тақдимотда видеолавҳа ёрдамида ҳар бир ўзгартириш бўйича тўлиқ тушунтириш берилди.

Семинар қатнашчиларида юзага келган саволларга, шунингдек, ЎФА Биринчи вице-президенти Равшан Эрматов ҳам жавоб берди. Келажакда бу каби учрашувларни мунтазам равишда ўтказиб боришга келишиб олинди.