Жорий йилнинг 29 июль – 4 август кунлари Хитойнинг Ченду шаҳрида ёшлар ўртасида бадминтон бўйича Халқаро ўртоқлик турнири бўлиб ўтади.

Хитой Халқ Республикаси Миллий бадминтон федерацияси ва “Сун Чин Лин” фонди томонидан ташкил этилган турнирда ўзбекистонлик 12 нафар ёш бадминтончилар ҳам иштирок этишади.

Кеча тунда вакиллaримиз Ислом Каримов номидаги Тошкент халқаро аэропортидан мазкур мусобақада иштирок этиш учун жўнаб кетишди.

13 ёшгача бўлган мактаб ўқувчилари ўртасида ўтказилаётган халқаро турнирда ёшларимиз жаҳоннинг турли мамлакатларидан ташриф буюрган тенгдошлари билан куч синашишади.

Делегациямиз Хитойга ташрифи давомида мусобақада иштирок этиш билан биргаликда ўзаро тажриба алмашиш учун бир қатор ўқув-машғулот семинарларида ҳам иштирок этишади.

Жаҳонда оммавийлиги бўйича футболдан кейинги ўринни эгаллаган бадминтон спортини юртимизда оммалаштириш ва ривожлантириш учун кенг кўламли ишлар амалга оширилмоқда. Хусусан, пойтахтимиз ва бир қатор вилоят марказларида янги замонавий бадминтон марказлари фойдаланишга топширилди.

Хитойда бадминтон барча ёш тоифасидаги инсонлар ўртасида кенг оммалашиб миллий спорт тури даражаси етган. Ушбу спорт тури бўйича нуфузли мусобақаларда энг яхши натижаларни хитойлик спортчилар қайд этиб келишаётгани бежиз эмас. Айнан шу сабабли юртимизда бадминтон спортини оммалаштиришда Хитой тажрибасини ўрганиш бўйича ҳамкорлик қилинмоқда.

Ушбу мусобақага таклиф этилган спортчиларимизнинг барча харажатлари (авиабилетлардан ташқари) ташкилотлар томонидан беғараз қоплаб берилаётганлигини ҳам қайд этиб ўтиш лозим.