УЕФА «Челси» ва «Ливерпуль» ўртасида ўтадиган Европа суперкубоги баҳсини бошқарадиган ҳакамлар номини эълон қилди.
Эътиборли томони, тарихда илк марта эркаклар ўртасидаги еврокубок баҳсини аёл ҳакам бошқарадиган бўлди. Бош ҳакам — франциялик Стефани Фраппар. Унга қанотларда Мануэла Николози ва Мишель О’Нил ёрдам беришади. Захира ҳаками вазифасини эса туркиялик Жунайт Чақир бажаради.
Фраппар июль ойида бўлиб ўтган аёллар ўртасидаги жаҳон чемпионати финали (АҚШ-Голландия)ни бошқарганди.
Ушбу ҳакам Франция Лига-1 мусобақасининг якунланган мавсумда дебют қилган эди. Келаси мавсумдан эса у доимий асосда ишлайди.
«Ливерпуль» – «Челси» ўйини 14 август куни Истанбул шаҳрида бўлиб ўтади.