Марказий Осиё 3.4 зона Президенти Хусан Турдиалиев Худайқулович илтимосига биноан, ФИДЕ Президенти Аркадий Дваркович номига бир неча бор илтимоснома юборилди. Ушбу илтимосноманинг мазмунига кўра, ҳамюртимиз шахмат бўйича Ўзбекистон миллий терма жамоаси аъзоси Халқаро гроссмейстер, Олимпиада чемпиони Нодирбек Абдусатторовнинг сўнгги йилларда кўрсатган натижалари ҳамда унинг имкониятларини ҳисобга олиб, “FIDE WORLD CHESS CUP”да қатнашиш учун муносиб номзод экани, аниқ фактлар билан кўрсатилди.
Маълумки, белгиланган квотлардан ташқари, ФИДЕ Президенти ҳам 5 нафар иштирокчини мустақил тавсия этиш ҳуқуқига эга. 5 та иштирокчидан 4 нафари аллақачон маълум бўлиб улгурган эди, аммо охирги 1 ўрин учун асосий даъвогарлар орасида ҳамюртимиз Нодирбек Абдусаттаров ҳамда Ҳиндистон вакили Ниҳал Саринлар номзодлари илгари сурилган эди.
Қилинган ҳаракатлар натижаси ўлароқ, Халқаро гроссмейстер Юдет Полгар, халқаро гроссмейстер Владимир Крамник, ФИДЕнинг ижрочи директори халқаро гроссмейстер Виорел Балаган бошчилигидаги Комиссия, Ҳиндистон вакили Ниҳал Сарин ҳамда Ўзбекистонлик Нодирбек Абдусатторов икки ёш гроссмейстарларнинг натижаларини кўриб чиқиб, халқаро гроссмейстер Нодирбек Абдусаттаровни “FIDE WORLD CHESS CUP” турнирида иштирок этишга тавсия қилишди. Шу тариқа ватандошимиз ушбу нуфузли беллашувда қатнашиш ҳуқуқини қўлга киритди.
Ўзбекистон Шахмат федерацияси матбуот хизматининг хабар беришича, мусобақа 9 сентябрдан 4 октябргача Россия федерацияси, Ханта-Мансийск шаҳрида бўлиб ўтади. Шу ўринда ушбу нуфузли турнирда, Ўзбекистон номидан Шахмат бўйича 17чи Жаҳон чемпиони, халқаро гроссмейстр Рустам Қосимжонов ҳам иштирок этади.
Ўзбекистон Шахмат федерацияси шахматчимизга бўлиб ўтадиган кубок баҳсларида омад ва зафарлар тилаб қолади.
