Россия чемпионатининг 5-тури доирасида сўнгги ўйин бўлиб ўтди. «Ростов» ўз майдонида «Крилья Советов»ни қабул қилди.

Баҳснинг 13-дақиқасида мезбонлар ҳисобни очишлари мумкин эди. Шомуродовнинг узатмасидан кейин Ионов 15 метрлардан зарба берди. Самараликлар посбони тўпни қийинчилик билан майдон ташқарисига чиқариб юборди.

Учрашувнинг 33-дақиқасида эса ҳисоб очилди. Ионов жамоадоши билан "девор" ўйнаб, чап томондан жарима майдончасига кириб борди ва дарвоза майдони атрофига узатма берди. Элдор Шомуродов эса тўпни дарвозага буриб қўйди. Тўп устунга тегиб, тўрга бориб тушди.

Иккинчи бўлим эса асосан майдон марказидаги курашлар остида кечди. Ўйинга қўшиб берилган дақиқаларда "Ростов" дарвозабони Сергей Песьяков жаримадан йўлланган хавфли зарбани қайтариб, жамоасининг ғалабасига ўз ҳиссасини қўшди.

Ўзбекистонлик футболчи мазкур ўйинда бошланғич таркибда тушиб, ҳакамнинг финал ҳуштаги янграгунга қадар майдонда ҳаракат қилди. Шомуродовнинг ушбу мавсумдаги голлари сони 4тага етди. У Артём Дзюба ("Зенит") ва  Александр Соболев ("Крилья Советов") билан бирга тўпурарлар рўйхатини бошқармоқда.

Мазкур ғалабадан кейин "Ростов" ўз очколарини 11тага етказиб, жадвалда 2-ўринга кўтарилиб олди.

Россия премьер-лигаси, 5-тур
Ростов – Крилья Советов 1:0 (1:0)
Гол: 1:0 – 33 Элдор Шомуродов.
Ростов – Песьяков, Козлов, Чистяков, Сигурдссон, Чернов (Долгов, 90), Еременко, Ионов (Глебов, 73), Байрамян (Зуев, 55), Попов, Норманн, Шомуродов.
Крилья Советов – Рыжиков, Карпов, Чернов, Анюков (Зиньковский, 70), Комбаров, Гацкан, Тимофеев, Кабутов, Гынсарь (Радоньич, 73), Канунников, Соболев (Голенков, 87).
Огоҳлантиришлар: Чистяков (63), Козлов (64), Песьяков (88).