Россиялик шарҳловчи Нобель Арустамяннинг маълумот тарқатишича, Россия чемпионатининг 5-тури доирасида бўлиб ўтган «Ростов» ва «Крилья Советов» жамоалари ўртасидаги ўйинни (1:0) «Галатасарой» скаутлари кузатишган. Бу учрашувда ягона голни Элдор Шомуродов уришга муваффақ бўлди.

«Ҳамкасбларим жонли эфир пайтида Ростовдаги ўйинни туркиялик скаутлар кузатиб боришаётганини айтишган эди, аммо қайси жамоа вакиллари эканига ойдинлик киритишмади. Қўшимча қилиб айтишим мумкинки, «Галатасарой» скаутлари Соболев ва Шомуродовни кузатишди. Лекин улар ҳозирча ўзбекистонлик футболчини харид қила олишмайди, боиси, унинг нархи юқори. Бундан ташқари, «Ростов»нинг ўзи ҳам уни сотмайди», – дея ёзди Арустамян ўзининг твиттердаги саҳифасида.

Россия чемпионатининг 5-туридан кейин Соболев ва Шомуродов 4та гол билан тўпурарлар рўйхатини бошқаришмоқда. Transfermerkt Соболевни – 1,2 миллион евро, Шомуродовни эса 1,5 миллион еврога баҳолаган.