Испания чемпионатининг янги мавсумига старт берилди. Дастлабки ўйин Бильбао шаҳрида "Атлетик" ва "Барселона" жамоалари ўртасида бўлиб ўтди.

Басклар ўйинни анча фаол бошлаб, меҳмонлар дарвозаси олдида бир қатор хавфли вазиятларни яратишди. Аммо гол уриш учун энг қулай вазиятга дастлаб каталонияликлар эга бўлишди. Баҳснинг 32-дақиқасида "Атлетик" ҳимоячиси тўпни орқага - ўз дарвозабонига узатишга қарор қилди. Ўша жойда турган Луис Суарес тайёр "совға"дан фойдалана олмади. Унинг зарбасидан кейин тўп устунга тегиб қайтди.

Орадан кўп ўтмасдан уругвайлик футболчи жароҳат олиб, майдонни тарк этди. Унинг ўрнига Рафинья туширилди. Биринчи бўлим якунланиш арафасида "Барса" футболчисининг зарбасидан кейин тўп бу сафар тўсинга тегди.

Иккинчи бўлимда ҳудудий устунлик "кўк-анорранглилар" томонида бўлди. Аммо ғалаба тўпини киритиш бильбаоликларга насиб этди. Ўнг қанотдан етказиб берилган тўпга жарима майдончаси ичида турган Адурис қайчи услубида зарба берди. Кучли чиққан зарбани Марк-Андре тер Штеген бартараф эта олмади. Бу пайтда баҳснинг 89-дақиқаси ўтиб бораётган эди, "Барса" жавоб тўпини киритишга улгурмади.

Шу тариқа, Месси майдонга тушмаган, де Йонг ва Гризманн дебют қилган учрашувда "Барселона" мағлубиятга учради.

Испания Ла лигаси, 1-тур
"Атлетик" - "Барселона" 1:0
Гол: Адурис, 89 - 1:0
"Атлетик": Унаи Симон, Нуньес, Берчиче, Капа, Де Маркос (Сансет, 66), Унаи Лопес (Беньят, 81), Рауль Гарсия, Муниаин, Дани Гарсия, Йерай Альварес, Уильямс (Адурис, 88).
"Барселона": тер Штеген, Семеду, Лангле, Пике, Сержи Роберто (Карлес Перес, 76), де Йонг, Аленья (Ракитич, 46), Дембеле, Альба, Гризманн, Суарес (Рафинья, 37).
Огоҳлантиришлар: Пике (60), Нуньес (65).