«Пари Сен-Жермен» ва «Барселона» ўртасидаги музокаралар сўнгги босқичга кирмоқда. Тез кунларда барчаси ҳал бўлади: Неймар ё "Камп Ноу"га кўчиб ўтади ёки футболчи Парижда қолади.

Каталонияликлар сўнгги 2 ҳафтада бразилиялик трансфери борасида фаол иш олиб борди. Аммо "Барса" томонидан берилган бир нечта таклифлар "ПСЖ"га маъқул келмади. Шу боис, французлар "Барселона"га ультиматум қўйди: Неймар керак бўлса, таклиф миқдорини ошириш лозим, акс ҳолда 27 ёшли футболчи сотилмайди. Улар ҳужумчини "Реал"га сотишлари мумкин.

"Кўк-анорранглилар" сўнгги таклиф устида ишлашмоқда. Бу таклиф эртага — 26 август, душанба куни юборилади. Бу галги музокарада «Барселона» президенти Хосеп Мария Бартомеунинг шахсан ўзи иштирок этиши кутилмоқда. Сўнгги таклиф сифатида «Барса» «ПСЖ»га икки футболчи — Иван Ракитич ва Усмон Дембеле ҳамда маълум миқдорда пул таклиф қилиши мумкин.

Агар шундай бўлса, кўп нарса Дембелега боғлиқ бўлиб қолади. Боиси, сўнгги маълумотларга қараганда, у "Камп Ноу"ни тарк этмоқчи эмас.