Токиода дзюдо бўйича жаҳон чемпионатининг иккинчи кун беллашувлари старт олди. Регламентга кўра эркаклар ўртасида -66 кг, аёллар бўйича -52 кг вазн тоифаларида беллашувлар ўтказилмоқда.

Бугунги кун дастурида 3 нафар вакилимиз ғолиблик учун кураш олиб бориши белгиланган эди. Эътиборлиси, уларнинг барчаси баҳсларни кўнгилдагидек давом эттиришяпти.
Диёра Келдиёрова Португалия ва Озарбайжон вакилаларини мағлуб этиб, учинчи даврага йўл олди. Ҳамюртимиз бу босқичда амалдаги жаҳон чемпиони япониялик Ута Абэ билан рўбаро келади.

Йигитларимиздан Шаҳрам Аҳадов Мадагаскар, Непал, Хитой Таипейидан ташриф буюрган полвонлардан устун келиб, тўртинчи босқичда курашадиган бўлди. Аҳадов чорак финал йўлланмаси учун Жанубий Корея вакили Лим Хван Кимга қарши курашади. Шунингдек, ушбу вазн тоифасида Сардор Нуриллаев учинчи даврада франциялик Килиан Ле Блушни мусобақадан чиқариб юборди. Вакилимиз чорак финалга чиқиш учун япониялик Жошира Маруяма билан ҳисоб-китоб қилади.