Tokioda dzyudo bo‘yicha jahon chempionatining ikkinchi kun bellashuvlari start oldi. Reglamentga ko‘ra erkaklar o‘rtasida -66 kg, ayollar bo‘yicha -52 kg vazn toifalarida bellashuvlar o‘tkazilmoqda.

Bugungi kun dasturida 3 nafar vakilimiz g‘oliblik uchun kurash olib borishi belgilangan edi. E’tiborlisi, ularning barchasi bahslarni ko‘ngildagidek davom ettirishyapti.
Diyora Keldiyorova Portugaliya va Ozarbayjon vakilalarini mag‘lub etib, uchinchi davraga yo‘l oldi. Hamyurtimiz bu bosqichda amaldagi jahon chempioni yaponiyalik Uta Abe bilan ro‘baro keladi.

Yigitlarimizdan Shahram Ahadov Madagaskar, Nepal, Xitoy Taipeyidan tashrif buyurgan polvonlardan ustun kelib, to‘rtinchi bosqichda kurashadigan bo‘ldi. Ahadov chorak final yo‘llanmasi uchun Janubiy Koreya vakili Lim Xvan Kimga qarshi kurashadi. Shuningdek, ushbu vazn toifasida Sardor Nurillayev uchinchi davrada fransiyalik Kilian Le Blushni musobaqadan chiqarib yubordi. Vakilimiz chorak finalga chiqish uchun yaponiyalik Joshira Maruyama bilan hisob-kitob qiladi.