Душанба куни "Барселона" клубининг афсонавий собиқ футболчиси ва мураббийи Йохан Кройф ҳайкалининг очилиш маросими бўлиб ўтди. Ушбу ҳайкал "Камп Ноу" стадионининг кириш йўлакларидан бирининг ёнида қад ростлади.
Ҳайкалнинг баландлиги 3,5 метр, унинг вазни бир ярим тоннага тенг, дея хабар тарқатди "Барселона" расмий сайти.
Ушбу асар муаллифи голландиялик Корри Аммерлаан ван Никерк ҳисобланади. Очилиш маросимида "Барселона" президенти Хосеп Бартомеу, шунингдек, Кройфнинг қариндошлари ва дўстлари иштирок этишди.
Эслатиб ўтамиз, Йохан Кройф футболчи сифатида 5 йил "Барселона"да ўйнаган бўлса, 8 йил давомида мураббийлик қилган. У 2016 йилда ўпка саратони туфайли 68 ёшида вафот этган.
