Таниқли журналист ва спорт шарҳловчиси Хайрулла Ҳамидов ўзининг телеграм канали орқали боқий дунёга рихлат қилган падари бузрукворининг ҳақига дуо қилганларга миннатдорчилик билдирди. Унинг маълум қилишича, Ўзбекистон терма жамоаси бош мураббийи Эктор Купер ҳам таъзия мақсадида унинг хонадонига ташриф буюрган.

"Йўқлаганларга, дуода бўлганларга, таъзия изҳор этганларга ташаккур: Аллоҳдан барча-барчангизга яхшиликлар сўраймиз.

Бугун терма жамоамиз бош мураббийи ҳам йўқлаб, уйимизда бир соатга яқин ташрифда бўлди. Ота-онасидан ёшлигида ажраганини, ота-онасининг дийдорини узоқ йиллар кўрган бизга ўхшаганлар шукр қилишимиз лозимлигини ўз тилида тушунтирган бўлди. Ҳаёт ҳақида анча суҳбатлашдик...

Башар болалари ўртасидаги Инсонийлик ўлмасин! Раҳмат ҳаммага...", — дея ёзди Хайрулла Ҳамидов.