"Барселона" раҳбарияти жамоа етакчиси Лионель Мессини ҳали узоқ клубда олиб қолмоқчи. Mundo Deportivo тарқатган хабарга кўра, каталонияликлар 32 ёшли футболчига умрбод шартнома таклиф қилишга тайёр.
Эслатиб ўтамиз, аргентиналик футболчи билан амалдаги шартномага кўра, Месси келаси йилнинг ёзида жамоани эркин агент сифатида тарк этиш ҳуқуқига эга.
Томонлар янги шартнома борасида ҳали музокараларни бошлашмади. Аммо Мессининг отаси ва "Барса" президенти Хосеп Мария Бартомеу доимий равишда алоқада бўлиб туришибди.
Футболчининг ҳозирги шартномаси 2021 йилга қадар тузилган. У жароҳат туфайли ушбу мавсумда ҳали майдонга тушмади.
Месси - "Барселона" тарбияланувчиси ҳисобланади. У асосий жамоа сафида 17 ёшидан бери ўйнаб келади.