Бугун спорт курашлари бўйича жаҳон чемпионатининг тўртинчи кун баҳсларига старт берилади. Регламентга кўра, ушбу кун дастурида аёллар кураши бўйича саралаш баҳслари ва юнон-рим курашида кечаги дастурдан сўнг медаллар учун курашадиган спортчилар баҳс олиб боришади.

Қизларимиздан икки нафари Даулетбике Яхшимуратова (-50 кг) ҳамда Актенге Кеунимжаева (-53 кг) Токио Олимпиадаси йўлланмасини қўлга киритишга уриниб кўради. Севара Эшмуратова (-55 кг) курашадиган вазн Олимпия ўйинлари дастурига киритилмаган ва ушбу вакиламиз ЖЧ медаллари учун баҳс олиб боради.

-50 кг: Даулетбике Яхшимуратова – Эмилиа Сирису (Молдова)
-53 кг: Актенге Кеунимжаева – Лианна Эррера (Куба)
-55 кг: Севара Эшмуратова – Анника Вендл (Германия)

Кечаги баҳслар якунига кўра, Элмурат Тасмурадов ва Жалгасбай Бердимуратовни мағлуб этган рақиблар финалгача етиб боргани учун улар бронза медали ва Токио-2020 лицензияси учун курашиш имкониятини сақлаб қолишган. Уларнинг бу йўлда ўтиш босқичидаги дастлабки рақиблари қуйидагича:

-60 кг: Элмурат Тасмурадов – Андрес Монтано (Эквадор)
-77 кг: Жалгасбай Бердимуратов – Володимир Яковлиев (Украина)