Қозоғистон пойтахтида ўтказилаётган спорт курашлари бўйича жаҳон чемпионатининг бугунги куни вакилларимиз учун омадли кечмоқда. Бир неча дақиқа аввал -77 килограммда классик курашчимиз Жалгасбай Бердимуратов ҳам Токио Олимпиадасида иштирок этиш ҳуқуқини қўлга киритди.
Вакилимиз бугунги беллашувларни украиналик Володомир Яковлиев устидан қозонилган ғалаба билан бошлади. Бронза медали учун курашиш имконини берувчи босқичда эса литвалик Паулиус Галкинас ҳам мағлуб этилди. Бу ғалаба Бердимуратовни Токио Олимпиадаси иштирокчилари қаторига киритди. Спорчтимиз кечки дастурда мусобақа мезбонларидан бири Асхат Дилмуҳаммедовга қарши бронза медали учун гиламга чиқади.
Шу тариқа ҳамюртларимизнинг Токио Олимпиадасига қўлга киритган йўлланмалари сони еттитага етди. Бироз аввал Элмурат Тасмурадов ҳам -60 килограмм вазн тоифасида лицензия соҳибига айланган эди.
