Qozog‘iston poytaxtida o‘tkazilayotgan sport kurashlari bo‘yicha jahon chempionatining bugungi kuni vakillarimiz uchun omadli kechmoqda. Bir necha daqiqa avval -77 kilogrammda klassik kurashchimiz Jalgasbay Berdimuratov ham Tokio Olimpiadasida ishtirok etish huquqini qo‘lga kiritdi.
Vakilimiz bugungi bellashuvlarni ukrainalik Volodomir Yakovliyev ustidan qozonilgan g‘alaba bilan boshladi. Bronza medali uchun kurashish imkonini beruvchi bosqichda esa litvalik Paulius Galkinas ham mag‘lub etildi. Bu g‘alaba Berdimuratovni Tokio Olimpiadasi ishtirokchilari qatoriga kiritdi. Sporchtimiz kechki dasturda musobaqa mezbonlaridan biri Asxat Dilmuhammedovga qarshi bronza medali uchun gilamga chiqadi.
Shu tariqa hamyurtlarimizning Tokio Olimpiadasiga qo‘lga kiritgan yo‘llanmalari soni yettitaga yetdi. Biroz avval Elmurat Tasmuradov ham -60 kilogramm vazn toifasida lisenziya sohibiga aylangan edi.
