Coca Cola Суперлига 21-тури доирасида Наманганнинг “Навбаҳор” жамоаси ўз майдонида Самарқанднинг “Динамо” клубини қабул қилади.    

Мазкур жамоалар шу кунгача Суперлига (олий лига) баҳсларида 47 марта ўзаро рўбарў келишган. Ушбу ўйинларда наманганликлар 25, “кўҳна шаҳарликлар” эса 13 марта зафар қучишган бўлса, 9та учрашувда дуранг қайд этилган. Тўплар нисбати – 84-43, “Навбаҳор” фойдасига.

Ўзаро ўйинларда “лочинлар” 84, “арслонлар” эса 48 очкони қўлга киритишган.     

Ушбу клублар ўртасидаги ўйинларда энг йирик ҳисоб 1996 ва 1997 йиллари Наманганда қайд этилган. Ўша мавсумларда “Навбаҳор” “Динамо” устидан тегишлича 6:0  ҳамда 7:1 ҳисобларида зафар қучган.

Эътиборлиси, самарқандликлар шу пайтгача наманганликларни йирик ҳисобда мағлубиятга учрата олишмаган.

Мазкур жамоалар шу кунгача Наманганда ўзаро 23та учрашув ўтказган. Ушбу ўйинлардан 17 тасида “Навбаҳор” ғалаба қозонган бўлса, яна 6та баҳсда дуранг қайд этилган. “Динамо” ҳали Наманганда зафар қуча олмаган.   Наманганда бўлиб ўтган учрашувларда тўплар нисбати -  53-10, жамоамиз фойдасига.

Бу клубларнинг биринчи даврада Самарқандда кечган баҳсида дуранг – 2:2 ҳисоби қайд этилганди. Ўша ўйинда “Навбаҳор”нинг голларига Славко Лукич ва Александр Касьян муаллифлик қилишганди.      

Бўлажак ўйинда севимли жамоамизга омад ёр бўлишини тилаб қоламиз.        

 “Навбаҳор“ ПФК матбуот хизмати.