Кўпгина спорт турлари қатори каратэ бўйича Ўзбекистон миллий терма жамоаси ҳам Токио Олимпиадаси йўлланмаларини қўлга киритиш учун астойдил ҳозирлик кўрмоқда. Келаси йилги Олимпия ўйинларига кўпроқ лицензия олиш ва унга спортчиларимизни муносиб тайёрлашда хорижлик тажрибали мутахассисларнинг ҳам хиссаси катта. Бугундан Ўзбекистон терма жамоасида эронлик Шахаб Cултани бош мураббий сифатида иш бошлади. Бугун ушбу мутахассисни таништиришга бағишланган матбуот-анжумани ўтказилди.
Анжуманда Жисмоний тарбия ва спорт вазирининг биринчи ўринбосари Ойбек Касимов, Миллий олимпия қўмитаси вице-президенти Сакен Полатов, Ўзбекистон каратэ федерацияси раҳбари Алам Муллаев ва Эрон Ислом Ресбпубликасининг юртимиздаги элчихонаси вакиллари иштирок этишди.
“Ўзбек каратэчилари Осиё ва жаҳонда етакчилардан саналишади. Каратэчиларингизнинг Олимпия ўйинлари лицензиясини қўлга киритишга имкониятлари етарли экани, уларнинг катта маҳорати ушбу терма жамоани танлашимга туртки бўлди. Олдимизда Премьер-лига ва А серия таснифига кирувчи бир нечта мусобақалар орқали йўлланма олиш имконияти мавжуд. Умуман лицензия қўлга киритиш учун олдимизда икки йўл бор: бири рейтинг, иккинчиси келаси йил Парижда ўтадиган лицензион мусобақа орқали. Умид қиламанки, жамоа билан ҳамжиҳатликда ҳар икки йўл орқали ҳам бир нечта йўлланмалар қўлга киритишга муваффақ бўламиз. Шу ўринда мени илиқ кутиб олишгани учун Ўзбекистон Миллий олимпия қўмитаси, Жисмионий тарбия ва спорт вазирлигига миннатдорчилигимни изҳор айтиб қоламан”, – деди Шахаб Cултани.
Шундан сўнг мутасаддилар пойтахтимизда старт олган каратэ бўйича ўсмирлар, ёшлар ва катталар ўртасидаги Ўзбекистон кубоги баҳсларининг очилиш маросимида иштирок этишди.