Ko‘pgina sport turlari qatori karate bo‘yicha O‘zbekiston milliy terma jamoasi ham Tokio Olimpiadasi yo‘llanmalarini qo‘lga kiritish uchun astoydil hozirlik ko‘rmoqda. Kelasi yilgi Olimpiya o‘yinlariga ko‘proq lisenziya olish va unga sportchilarimizni munosib tayyorlashda xorijlik tajribali mutaxassislarning ham xissasi katta. Bugundan O‘zbekiston terma jamoasida eronlik Shaxab Cultani bosh murabbiy sifatida ish boshladi. Bugun ushbu mutaxassisni tanishtirishga bag‘ishlangan matbuot-anjumani o‘tkazildi.

Anjumanda Jismoniy tarbiya va sport vazirining birinchi o‘rinbosari Oybek Kasimov, Milliy olimpiya qo‘mitasi vise-prezidenti Saken Polatov, O‘zbekiston karate federasiyasi rahbari Alam Mullayev va Eron Islom Resbpublikasining yurtimizdagi elchixonasi vakillari ishtirok etishdi.

“O‘zbek karatechilari Osiyo va jahonda yetakchilardan sanalishadi. Karatechilaringizning Olimpiya o‘yinlari lisenziyasini qo‘lga kiritishga imkoniyatlari yetarli ekani, ularning katta mahorati ushbu terma jamoani tanlashimga turtki bo‘ldi. Oldimizda Premyer-liga va A seriya tasnifiga kiruvchi bir nechta musobaqalar orqali yo‘llanma olish imkoniyati mavjud. Umuman lisenziya qo‘lga kiritish uchun oldimizda ikki yo‘l bor: biri reyting, ikkinchisi kelasi yil Parijda o‘tadigan lisenzion musobaqa orqali. Umid qilamanki, jamoa bilan hamjihatlikda har ikki yo‘l orqali ham bir nechta yo‘llanmalar qo‘lga kiritishga muvaffaq bo‘lamiz. Shu o‘rinda meni iliq kutib olishgani uchun O‘zbekiston Milliy olimpiya qo‘mitasi, Jismioniy tarbiya va sport vazirligiga minnatdorchiligimni izhor aytib qolaman”, – dedi Shaxab Cultani.

Shundan so‘ng mutasaddilar poytaxtimizda start olgan karate bo‘yicha o‘smirlar, yoshlar va kattalar o‘rtasidagi O‘zbekiston kubogi bahslarining ochilish marosimida ishtirok etishdi.