Суперлиганинг 22-туридан ўрин олган “Металлург” ҳамда  "Сўғдиёна" жамоалари ўртасидаги ўйин якунланди. Ўйиндан сўнг матбуот анжуманининг иккинчи қисмида "Металлург" бош мураббийи Андрей Шипилов журналистлар саволларига жавоб қайтарди.

- Биз ҳар қандай рақибни ҳурмат қиламиз ва уларга қарши ўйинга пухта ҳозирлик кўрамиз. Сўғдиёна ҳам бундан мустасни эмас. Мазкур учрашувга ҳам ҳар томонлама жиддий тайёрлангандик. Йигитларнинг ўйинидан, ҳаракатидан қониқиш ҳосил қилдим. Уларга эътирозим йўқ. Бугунги натижа ўйинга мос бўлмади. Адолат мезонларига тўғри келмайди. Биз ғалабага ҳақли ўйин кўрсатдик. Бироқ омад рақибга кулиб боқди.

Бугун чиройли ўйин кўрсатишимизга ўртада учрашувни бошқариб борган инсон халақит берди. Нафақат Металлургга, Сўғдиёна жамоасига ҳам тўп учун курашишга имкон бермади. Бўлар бўлмасга, асоссиз ҳуштаклари билан ўйинчиларнинг ҳаракатини тўхтатиб қўяверди. Ҳар иккала жамоа ўйинчиларини майдонда тирқиратиб юборди. Ҳар иккала жамоанинг ўз вазифаси бор.

Сўғдиёна жамоасини ғалаба билан табриклайман. Биз эса ҳаракатда давом этамиз. Бугун бой берилган имконият, очколарни бошқа жойдан, бошқа ўйинлардан топишга уринамиз, дейди Андрей Сергеевич.