Ҳозирда футболчилар ва клуб ўртасида тузуладиган шартномаларнинг ўртача узунлиги 3 йилдан ошмаяпти. Бундай йўл тутиш орқали икки томонҳам эҳтиёткорликни биринчи планга олиб чиқишмоқда. Шунга қарамай, барча футболчи ва клублар шу йўлдан боришмоқда деб бўлмайди. Яқиндагина «Атлетико Билбао» клуби ўз футболчиси Иньяки Уильямсга 9 йиллик шартнома таклиф қилди ва футболчи ҳам таклифни рад этмади. Хўш футбол тарихида энг ҳайратланарли даражада узун шартномага эга футболчилар ҳақида яна нималарни биламиз? Бугун ушбу мавзу атрофида сўз юритамиз.
Саул
Испаниялик футболчи 20 ёшга тўлмасидан олдин «Атлетико Мадрид»нинг етакчи футболчисига айланган ва унинг атрофида гранд клублар кўпая бошлаган эди. Айниқса 2016/17-йилги мавсумда футболчи барчанинг эътиборини қозонди ва жамоасининг ЕЧЛда ярим финалга қадар етиб боришида катта роль ижро этди. Ўша йили ёшлар ўртасида болиб ўтган жаҳон чемпионатининг финалига қадар етиб борган Саул мусобақанинг тўпуарига айланди ва янада машхур бўлиб кетди. Айниқса, «Барселона» футболчи билан жиддий қизиқиб қолди. «Матрасчилар» Саулни ўз жамоасида олиб қолиш учун 9 йиллик шартнома таклиф қилади. Футболчи клуб томонидан берилган шартномага ўйлаб ўтирмасдан қўл қўйди ва 2026-йилга қадар Мадрид жамоасида тўп сурадиган бўлди. Бу «Атлетико Мадрид» жамоасининг сўнгги 50 йил ичида таклиф этган энг узоқ муддатли шартномаси сифатида тарихда қолиши аниқ.
Денилсон
1998-йилда бўлиб ўтган жаҳон чемпионатида порлаган Денилсон мусобақа олдидан Испаниянинг «Бетис» жамоасига 23 миллион фунт стерлинг эвазига ўтади ва дунёнинг энг қиммат футболчисига айланади. «Бетис» ўз юлдузини иложи борича кўпроқ клубда сақлаб қолиш учун унга 11 йиллик шартнома таклиф этади. Футболчи узоқ ўйлаб ўтирмасдан рози бўлади. Орадан 4 йил ўтиб у Жаҳон чемпионатида ғолиб бўлишни уддалаган бўлсада, «Бетис» клубини янги даражага олиб чиқа олмади. Футболчи ўз клубида фақат бир бор 2005-йилда Испания кубогига эга чиқишнигина уддалади холос. Футболчи 7 йил давомида Испанияда қолди. Қаҳрамонимиз ўз спорт формасини йўқотиб қўйгани боис заҳирадан муқим ўрин олгач, уни «Бордо»га сотиб юборишди.
Леионель Месси
Аргентиналик даҳо ҳақида узоқ сўзлашданинг хожати йўқ, чамамда. Футбол оламида барчага барчасини исботлашга муваффақ бўлган қаҳрамонимиз бундан бир неча йил илгари узоқ муддатли шартнома имзолагани боис бугунги рщйхатда мавжуд. Футболчи 2004-йилда клуб билан ўзининг илк шартномасига қўл қўйган бўлсада, йил охирига қадар «Барселона» футболчи билан шартномани икки бор узайтиришга қарор қилади. 2005-йилга «Барселона» футболчи билан шартномани 2014-йилга қадар чўзади ва бу қарор юз фоиз ўзини оқлайди. Месси ҳеч қаерга кетмаслигини ич-ичидан ҳис этганича, бор эътиборини майдонга қаратади ва рекордлар кетидан рекордлар ўрнатишга тушиб кетади. Шу ўринда айтиб ўтиш лозим, «Барселона» Лео учун ҳар сафар моддий томондан жуда қулай шартномалар таклиф қилган ва аргентиналик футболчи узоқ муддат давомида дунёнинг энг катта маош олувчи футболчилари рўйхатини бошқариб борган. Маълумотларга қараганда, «Барселона» ўз етакчси учун янги шартнома таклиф қилиш ҳақида бош қотирмоқда. Кўрамиз, бус афар ҳам Католония супер клуби футболчига узоқ муддатли шартнома таклиф эта олармикан?
Андрес Иньеста
Испаниялик футбол афсунгари бутун умрини «Барселона»га бағишлаган бўлсада, клуб футболчи учун бир неча бор узоқ муддатли шартнома таклиф қилишда давом этади. 2017-йилга келиб «Барселона» 32 ёшни қарши олган футболчига бутун умрлик шартнома таклиф қилади. Бу футболчи ўзи истамагунига қадар клубда қолиш дегани эди. Католония клубининг бундай йўл тутганидан клуб мухлисларининг боши осмонга етган бўлсада, ушбу шартнома асосида Андрес атиги бир мавсум тўп сурди ва Японияга йўл олди. Футболчи клубдаги ўз ўрнини ёшларга бўшатиб беришни режа қилганини мухлисалр кейинчалик англаб етишди ва унга бўлган хурматлари янада ошди.
Икер Касильяс
2008-йилда Мадриднинг «Реал» жамоаси ўз дарвозабонига бутун умрлик шартнома таклиф этган илк клуб сифатида тарихга кирди. Бунга қадар бирорта клуб ўз футболчиси учун бутун умрлик шартнома таклиф қилмаган эди. Касильяс ушбу шартномага қўл қўйгач, барча кутганидек фаолияти сўнггига қадар «қаймоқранглилар»сафида қолмади. Испаниялик афсонавий дарвозабон жамоада 7 мавсум давомида тўп сурди ва мавжуд бўлган барча мусобақаларда ғолиб чиқишга муваффақ бўлди. 2015-йилда клуб ва унинг мухлислари билан хайрлашганча Португалиянинг «Порту» жамоасига ўтиб кетди.
Бонус : Раул
2008-йилда «Қироллик клуби» ўз жамоаси фахрийларидан бири саналадиган Раулга ҳам бутун умрлик шартнома таклиф қилади ва ҳужумчи ўйлаб ўтирмасдан рози бўлади. Афсуски, орадан 2 йил ўтиб Раул аста-секин четга чиқиб қолаётганини ҳис этади ва Германиянинг «Шалке 04» клубига равона бўлади. Футболчининг ўзи ўша шартнома ҳақида ўз интервьюларидан бирида шундай деган эди :
«Мадрид клуби менга бутун умрлик шартнома таклиф қилган куни фаолиятим сўнггига қадар севган клубимда тўп суришимдан бахтли эдим. Афсуски, ҳаётда ҳамма нарса ҳам биз ўйлагандек кўришин олавермас экан. Шундай бўлсада, Мадридда ўтказган йилларим фаолиятимнинг энг унутилмас лаҳзалари сифатида ёдимда абадий қолади»
