Профессионал бокснинг супер ўрта (-76,2 кг) вазн тоифасида рингга чиқаётган Бектемир Мелиқўзиев (3-0, 3 КО) мазкур вазннинг WBO йўналиши чемпиони Билл Жо Сондерснинг (29-0, 14 KO) АҚШдаги дебют жангига муносабат билдирди.
Шу куни Сондерс илк марта АҚШда рингга чиқиб аргентиналик Марсело Косересни (28-1-1, 15 KO) 11 раундда нокаут эвазига мағлубиятга учратди. Кўпчилик мутахассислар шу куни Сондерс жуда бўш ва зерикарли жанг ўтказганини эътироф этишди. Бунга Бектемир Мелиқўзиев ҳам ўзининг твиттердаги саҳифаси орқали муносабат билдирди: «Илтимос, камаримни ўзимга берақол»
Мухлислардан бири эса бу твитга: «Агар бу жанг бўлса, сен уни жигарини даволатиш учун касалхонага равона қилишинг мумкин», дея қўшимча қилиб ўтди.
