Жорий йилнинг 16-22 ноябр кунлари Туркиянинг Мерсин шаҳрида “MERSİN METROPOLITAN MUNICIPALITY 4th INTERNATIONAL CHESS TOURNAMENT” турнири бўлиб ўтди. Турнирда Ўзбекистон шарафини Нодирбек Абдусатторов, Нодирбек Якуббаев, Алихан Гусейнов, Ҳалим Тўраев ҳамда қизлардан Севара Боймуратова ҳимоя қилди.
Ўзбекистон шахмат федерацияси матбуот хизматининг хабарига кўра, мазкур мусобақада 15 давлатдан 81 нафар шахматчи иштирок этди. Шуни ҳам таъкидлаш керакки, улар орасида 13 нафар гроссмейстер ҳамда 15 нафар халқаро спорт усталари ҳам дона суришди. Турнир швейцарча тизимда, 9 турдан иборат бўлди ҳамда ҳар бир партия охиригача 90 дақиқа вақт берилди.
Куни кеч ўз ниҳоясига етган мусобақада халқаро гроссмейстеримиз Абдусатторов Нодирбек 9 очкодан 7 очко жамғариб турнир ғолибига айланди. Боймуратова Севара эса 5,5 очко билан қизлар ўртасида чемпион бўлди.