АГМК жамоаси ҳужумчиси Зафар Полвонов “Қизилқум”га қарши ўйинда хет-трик қайд этиб, Суперлигада жорий мавсумдаги 15-голини, барча мусобақалардаги эса мазкур йилдаги 20-тўпини киритди.

“Қизилқум” дарвозасига киритилган Полвоновнинг биринчи тўпи ҳужумчининг фаолиятидаги 100-голи сифатида тарихга кирди.

Шу тариқа Зафар Полвонов юзлик довонни забт этган футболчилар каби Геннадий Красницкий клубига аъзо бўлди.

Зафар Полвонов фаолияти давомида “Шўртан”, АГМК, “Динамо” ва “Насаф” жамоалари сафида чемпионат доирасида 86, Ўзбекистон кубоги беллашувларида 13, Суперкубок, Лига Кубоги ва ОЧЛ доирасидаги ўйинларда биттадан гол урган ва ҳозирги кунда ҳужумчимизнинг ҳисобидаги голлари сони 102тага етган.

Қайд этиш керакки, Зафар Полвонов жорий мавсум ўзбек футболчилари орасида ўзи иштирок этган барча 5та мусобақада (ОЧЛ, Суперлига, Суперкубок, Лига Кубоги, Ўзбекистон Кубоги) гол урган ягона футболчи.

Мазкур чиройли натижа билан Зафар Полвоновни АГМК жамоаси ва мухлислар номидан табриклаймиз!