Жаҳоннинг ривожланган давлатларида футбол учрашувлари вақтида адолат ва шаффофликни таъминлаш мақсадида VAR (Video Assistant Referee – видео ёрдамчи ҳакам) тизимидан кенг фойдаланиб келинмоқда.

Ўтган мавсумнинг Лига кубоги финалида бу жараёнга бизда ҳам синовдан ўтказилди. Божланажак мавсумдан эътиборан эса уни кенг қўллаш кўзда тутилмоқда. Шу мақсадда VAR тизимини йўлга қўйиш, ушбу тизимдан самарали фойдаланиш бўйича ЎФА ишчи гуруҳи мамлакатимиз стадионларидаги ҳолат, уларнинг янги жараёнга тайёрлигини ўрганишяпти. Бу борада ЎФА ва ПФЛ мутахассисларига ЎзМТРК “Спорт” телеканали ҳамкорлик қилмоқда.

Махсус ишчи гуруҳ яқинда Бекобод шаҳрида ҳам бўлди ва “Металлург” марказий стадионига ташриф буюрди.

Меҳмонлар “Металлург” ПФК ҳамда “Марказий” ўйингоҳ вакилларига VAR камералари ўрнатилиши учун махсус жойлар ҳозирлаш, VAR фаолияти учун зарур чораларни кўриш бўйича мавжуд ҳолатни ўрганиб, камчиликларни бартараф этиш бўйича тавсиялар, камералар ўрнатиладиган махсус жойларни танлаш, уларни стандарт талаблар асосида жиҳозлаш бўйича ўз таклифларини билдиришди.

Айтиш керак, шу кунга қадар ишчи гуруҳ “Бунёдкор”, “Локомотив”, “Пахтакор”, “Навбаҳор”, АГМК, “Андижон” ҳамда “Навбаҳор” жамоалари уй учрашувларини ўтказадиган стадионлари билан ҳам танишиб чиқди.

Режа асосида Суперлиганинг бошқа клублари стадионлари ҳам кўздан кечирилиб, стадионларда VAR тизимидан фойдаланиш учун зарур шарт-шароитлар яратиш бўйича ишлар олиб борилади.

“Металлург” ПФК матбуот хизмати.