Jahonning rivojlangan davlatlarida futbol uchrashuvlari vaqtida adolat va shaffoflikni ta’minlash maqsadida VAR (Video Assistant Referee – video yordamchi hakam) tizimidan keng foydalanib kelinmoqda.

O‘tgan mavsumning Liga kubogi finalida bu jarayonga bizda ham sinovdan o‘tkazildi. Bojlanajak mavsumdan e’tiboran esa uni keng qo‘llash ko‘zda tutilmoqda. Shu maqsadda VAR tizimini yo‘lga qo‘yish, ushbu tizimdan samarali foydalanish bo‘yicha O‘FA ishchi guruhi mamlakatimiz stadionlaridagi holat, ularning yangi jarayonga tayyorligini o‘rganishyapti. Bu borada O‘FA va PFL mutaxassislariga O‘zMTRK “Sport” telekanali hamkorlik qilmoqda.

Maxsus ishchi guruh yaqinda Bekobod shahrida ham bo‘ldi va “Metallurg” markaziy stadioniga tashrif buyurdi.

Mehmonlar “Metallurg” PFK hamda “Markaziy” o‘yingoh vakillariga VAR kameralari o‘rnatilishi uchun maxsus joylar hozirlash, VAR faoliyati uchun zarur choralarni ko‘rish bo‘yicha mavjud holatni o‘rganib, kamchiliklarni bartaraf etish bo‘yicha tavsiyalar, kameralar o‘rnatiladigan maxsus joylarni tanlash, ularni standart talablar asosida jihozlash bo‘yicha o‘z takliflarini bildirishdi.

Aytish kerak, shu kunga qadar ishchi guruh “Bunyodkor”, “Lokomotiv”, “Paxtakor”, “Navbahor”, AGMK, “Andijon” hamda “Navbahor” jamoalari uy uchrashuvlarini o‘tkazadigan stadionlari bilan ham tanishib chiqdi.

Reja asosida Superliganing boshqa klublari stadionlari ham ko‘zdan kechirilib, stadionlarda VAR tizimidan foydalanish uchun zarur shart-sharoitlar yaratish bo‘yicha ishlar olib boriladi.

“Metallurg” PFK matbuot xizmati.