Айни кунларда Япониянинг Нагоя шаҳри делегацияси юртимизда бўлиб турибди.

Икки мамлакат ўртасидаги алоқаларни янада мустаҳкамлаш борасида қатор учрашув ва тадбирлар бўлиб ўтмоқда.

Бугун Ўзбекистон футбол ассоциациясида Нагоя шаҳри делегацияси вакиллари билан учрашув ўтказилди. Унда Ўзбекистон ва Япония мамлакатларининг футбол соҳасида ҳам яқиндан ҳамкорлик алоқаларини янада яхшилаш, болалар футболи, футзал, аёллар футболи бўйича биргаликда лойиҳа ва дастурлар амалга ошириш, турли ёш тоифалари ўртасида мусобақалар ташкил этиш, футболнинг турли йўналишлари бўйича ўзаро тажриба алмашиш, ўзбекистонлик мутахассисларнинг Японияга малака ошириш учун боришлари каби масалалар муҳокама этилди.

Иккитомонлама ҳамкорликни янада мустаҳкамлашда ЎФА Биринчи вице-президенти Равшан Эрматов мутахассисларимизнинг иш салоҳиятини ошириш учун япон тажрибасини ўрганиш муҳим эканини айтиб ўтди:

- Ҳакамлик фаолиятим давомида Японияда кўп маротаба бўлганман. Япон мутахассисларининг ўз касбига бўлган муносабати, уларнинг ўз ишга пухта ёндашиши, ташкилий масалаларда жуда ҳам профессионал эканликлари тақсинга лойиқ, айнан шунинг учун ҳам Япония футболи бугунги кунда шундай юқори савияга чиқди. Ўзаро ҳамкорлигимиз доирасида ўзбекистонлик футбол мутахассисларини Японияга малака ошириш учун юбориб, япон тажрибасини ўрганишга ҳаракат қиламиз. Ўзаро ҳамкорлик келажакда икки томон учун ҳам фойдали бўлишига ишонамиз, - дея таъкидлади ЎФА биринчи вице-президенти.

Ўз навбатида япониялик мутахассислар меҳмондўстлик ва илиқ муносабатдан мамнун эканликларини билдириб, алоқаларни янада мустаҳкамлашга тайёр эканликларини, бу борада эндиликда изчил равишда иш олиб борилишини таъкидлашди.