12-14 декабрь кунлари Хитойнинг Циндао шаҳрида дзюдо бўйича Мастерс сериясига кирувчи йирик мусобақа бўлиб ўтди. Унда иштирок этган Ўзбекистон терма жамоаси кеча тунда пойтахтимизга қайтиб келди.
11 нафар дзюдочи билан иштирок этган делегациямиз мазкур мусобақада 2 та бронза медалини қўлга киритди. Вакилларимиздан Шарофиддин Лутфиллаев (-60 кг) ва Диёра Келдиёрова (-52 кг) шоҳсупага кўтарилган. Шунингдек, қолган дзюдочиларимиз мусобақадаги иштироки орқали Токио Олимпиадаси йўлида қимматли рейтинг очколарини жамғариб олишди.
Таъкидлаш жоиз, делегациямиз Циндаодан аввал Япониянинг Осака шаҳрида Катта дубулға мусобақасида иштирок этиб, кунчиқар юртнинг ўзида бир неча кун халқаро ўқув-машғулот йиғинида қатнашган эди. Вакилларимизни кутиб олиш маросимида Ўзбекистон МОҚ вице-президенти, Ўзбекистон дзюдо федерацияси раиси Азизжон Камилов ҳам иштирок этиб, дзюдочиларимизни қўлга киритилган муваффақият билан қутлаб ўтди.
