Бугун бўлиб ўтган йилнинг энг яҳшиларини тақдирлаш маросимидан сўнг, кеча қаҳрамонларидан бири Жамшид Искандеровни суҳбатга тортдик

Ўтган мавсумдан фарқли ўлароқ, якунланган мавсумни анча фаол ўтказдингиз. Бунинг сири нимада?

Дарҳақиқат, ушбу мавсумда ўз даражамга қайтишга урундим. «Локомотив»га ўтганим ва ўйин амалиётига кўпроқ эга бўлганим боис яҳшироқ ўйин кўрсатган бўлсам керак. Энг муҳими мухлисларимизни хурсанд қилиш эди.

Сизни Россия клубларидан бирига ўтишингиз ҳақидаги миш-мишларда нақадар ҳақиқатга яқин?

Очиғи бу мавзуда сўзлашга ҳали эрта. Менга рус клубларидан бир нечта таклиф бўлгани рост. Айни дамда ушбу таклифлар бўйича клуб раҳбарлари билан музокаралар олиб борилмоқда. Жамоа номини айта олмасамда, ушбу трансфер амалга ошиши мумкин. Барчаси янги йилдан сўнг, ҳал бўлади.

Ушбу соврин сиз учун қай даражада муҳим бўлди?

Биринчи навбатда ўзимга бўлган ишончимни ортишини таъминлади. Ушбу ютуқ сабабли, кейинг мавсумда янада яҳшироқ тўп суришга ҳаракат қиламан. Асосий мақсадим ўзбекистон байроғини янада юқориларга кўтариш. Ушбу мақсадни амалга ошириш учун бор эътиборимни қаратишга ҳаракат қиламан.