Енгил вазндаги UFC чемпиони Ҳабиб Нурмагомедов Қозоғистонга ташриф буюриб, матбуот анжуманида иштирок этди ва 11 ёшли Али Турғанбеков билан учрашди. Бу бола оёқсиз туғилган. Ҳабиб Али билан гаплашди ва у билан футбол ўйнади. Бундан ташқари, россиялик спортчи 11 ёшли боланинг бир орзусини амалга оширишга ёрдам берди.

Али Турғанбековнинг ота-онаси Қозоғистон пойтахтига кўчиб келишга мажбур бўлди. Чунки, шароит йўқлиги туфайли болани у туғилган жойдаги мактабга қабул қилишмаган. Оёғи йўқлигига қарамай, у футбол ўйнайди. Шу пайтгача у Марадона, Неймар, Мбаппе каби машҳур футболчилар билан учрашган. У жарналистлар билан суҳбатда Ҳабиб билан учрашишни орзу қилишини маълум қилган.

Нурмагомедов эса 23 декабрь куни Алмати шаҳрида ташкил этилган Gorilla Fighting Championship мусобақасига ташриф буюрди. 24 декабрь куни ташкил этилган матбуот анжуманида эса Али унга «ПСЖ» юлдузлари — Неймар, Мбаппе, Тиаго Силва ва Каванининг имзоси туширилган тўпни совға қилди.

«Мен Ҳабибга ўзим учун қимматли бўлган совғани тақдим этдим, лекин мен кўпроқ инсонийлик хислатларини, эътибор, раҳмдилликни ҳамда Ҳабиб каби буюк чемпион ва камтар инсонларни қадрлайман. У менга кўп вақтини ва эътиборни ажратди», – дея ёзди Али ўзининг инстаграмдаги саҳифасига. 

Орадан 2 кун ўтиб эса Нурмагомедов Турғанбековни Бирлашган Араб Амирликларига олиб бориб, ҳозирда қишки таътилни Дубайда ўтказаётган Роналду билан учрашувни ташкил қилиб берди. Али Криштиану билан меҳмонхонада учрашди.

Болакай дастлаб Роналдуга тўпни отди ва бир нечта узатмалардан кейин ўз кумирини қучоқлаб олди.

«Мана нима учун сен жаҳондаги энг яхши футболчисан. Катта раҳмат, Криштиану. Сен менинг укамни бахтли қилдинг», – дея ёзди Ҳабиб учрашув видеосининг остига.