Yengil vazndagi UFC chempioni Habib Nurmagomedov Qozog‘istonga tashrif buyurib, matbuot anjumanida ishtirok etdi va 11 yoshli Ali Turg‘anbekov bilan uchrashdi. Bu bola oyoqsiz tug‘ilgan. Habib Ali bilan gaplashdi va u bilan futbol o‘ynadi. Bundan tashqari, rossiyalik sportchi 11 yoshli bolaning bir orzusini amalga oshirishga yordam berdi.

Ali Turg‘anbekovning ota-onasi Qozog‘iston poytaxtiga ko‘chib kelishga majbur bo‘ldi. Chunki, sharoit yo‘qligi tufayli bolani u tug‘ilgan joydagi maktabga qabul qilishmagan. Oyog‘i yo‘qligiga qaramay, u futbol o‘ynaydi. Shu paytgacha u Maradona, Neymar, Mbappe kabi mashhur futbolchilar bilan uchrashgan. U jarnalistlar bilan suhbatda Habib bilan uchrashishni orzu qilishini ma’lum qilgan.

Nurmagomedov esa 23 dekabr kuni Almati shahrida tashkil etilgan Gorilla Fighting Championship musobaqasiga tashrif buyurdi. 24 dekabr kuni tashkil etilgan matbuot anjumanida esa Ali unga «PSJ» yulduzlari — Neymar, Mbappe, Tiago Silva va Kavanining imzosi tushirilgan to‘pni sovg‘a qildi.

«Men Habibga o‘zim uchun qimmatli bo‘lgan sovg‘ani taqdim etdim, lekin men ko‘proq insoniylik xislatlarini, e’tibor, rahmdillikni hamda Habib kabi buyuk chempion va kamtar insonlarni qadrlayman. U menga ko‘p vaqtini va e’tiborni ajratdi», – deya yozdi Ali o‘zining instagramdagi sahifasiga. 

Oradan 2 kun o‘tib esa Nurmagomedov Turg‘anbekovni Birlashgan Arab Amirliklariga olib borib, hozirda qishki ta’tilni Dubayda o‘tkazayotgan Ronaldu bilan uchrashuvni tashkil qilib berdi. Ali Krishtianu bilan mehmonxonada uchrashdi.

Bolakay dastlab Ronalduga to‘pni otdi va bir nechta uzatmalardan keyin o‘z kumirini quchoqlab oldi.

«Mana nima uchun sen jahondagi eng yaxshi futbolchisan. Katta rahmat, Krishtianu. Sen mening ukamni baxtli qilding», – deya yozdi Habib uchrashuv videosining ostiga.