"Хетафе" "Реал"ни охирги марта уйида 2012 йил мағлуб этган экан. Эҳҳе, мадридликлар таркибида у даврлар Касильяс, Роналду, Игуаин, Ди Мария ва Мората каби йигитлар бўларди.

2008 йили ҳам Мадрид қўшнилари (яъни Хетафе шаҳри Мадрид остонасида жойлашган) шу ишни уддалашганини эслаймиз. "Реал" сафида Рауль, Гути, Ван дер Варт ва Снайдер ўйнаган. Зўр, а?

Қолган баҳсларда Қироллик клуби "Хетафе"га нон бермаган. Енгган, енгаверган...

Бугун яна улар тўқнаш келишади. Лекин олдинги мавсумлардан фарқли равишда мезбонларнинг ҳолати мақташга арзигулик. Жамоа 6-ўринда боряпти, иккинчи поғонадаги "Реал" билан етти очколик фарқ.

Анхель Родригес (8), Хайме Мата (5) ва Хорхе Молина (3) каби тажрибали футболчилари жамоанинг 16 голини уриб бўлишди. Айтмоқчимизки, "Реал" каби фақат бир ҳужумчига термулиб қолмаган "Хетафе".

Ҳимоя ҳам ёмонмас, энг кам гол ўтказганлар рўйхатида хетафеликлар 4-ўринда боришмоқда.

Хуллас, ушбу фактларга рақиб томонда кимсан "Реал" турганини қўшамизда, ўта савияли ўйин кўришга асосларимиз етарлилигини айтамиз.

Учрашув вақти ҳам идеал - 20:00! Бирга кузатамиз!