Англиянинг тўртинчи дивизиони вакили «Порт Вейл» клуби ҳужумчиси Томас Поуп «Манчестер Сити» ҳимоячиси Жон Стоунз устидан яна кулди.

Англия терма жамоаси 2019 йилнинг ёзида Голландияга 1:3 ҳисобида ютқазганидан кейин:

«Ҳа, мен тўртинчи дивизионда ўйнайман. У эса миллий терма жамоа сафида ўйнайди ва ҳафтасига 150 минг фунт стерлинг маош олади. У мендан миллион марта кучли футболчи эканини биламан, аммо мен ҳар ҳафта бажонудил унга қарши ўйнаган бўлардим ва бир мавсумда 40та гол урган бўлардим!», — дея ёзганди Томас ўзининг «Твиттер»даги саҳифаси орқали.

Кеча бўлиб ўтган Англия кубогининг 1/32 финал босқичи доирасида бўлиб ўтган ўйинда 35 ёшли футболчи "шаҳарликлар" ҳимоячиси билан тўп учун курашда устун келиб, рақиб дарвозасини ишғол қилди.

«Кечирасиз, мен барчага жавоб ёза олмайман. Фақат шуни айтишим мумкинки, ўшанда мен қаттиқ хато қилган эканман. Мен бундай ҳимоячига қарши ўйинда бир мавсумда 40та эмас, 50та гол ураман шекилли. Дам олиш кунингиз яхши ўтсин», — дея ёзди «Порт Вейл» ҳужумчиси бу сафар.

«Мен учун энг яхши вазият менинг голим эмас, Бенжамен Менди мени кийиниш хонаси олдида кутиб тургани бўлди. У мен билан селфига тушиб, «Манчестер Сити»нинг жамоавий чатида эълон қилмоқчи бўлган экан", — дея ёзди Поуп кейинроқ.