15 январь куни бўладиган Ўзбекистон U23 - Жанубий Корея U23 ўйини олдидан Корейс спорт нашрлари турли хил мақолалар чоп этишяпти. Аҳамиятлиси, корейслар ўтган Осиё чемпионати ғолиби сифатида Ўзбекистон U23 термасидан ҳайиқишаётганидир. “Choson Sport” нашри мухбири Ким Йонг Гининг never.com сайтидаги “Ажойиб ташкил этилган, ўткир тиғли, уч найзали Ўзбекистондан эҳтиёт бўлинг!” номли таҳлилий мақоласи эътиборимизни тортди.

“Ўткир тиғли, уч найзали - Ўзбекистон!”. Кореялик журналист Бобир Абдухолиқов, Жасур Яхшибоев ва Санжар Қодирқуловни “ўткир тиғли, уч найза” дея таърифлади. Хусусан, “тажовузкорлар”дан эҳтиёт бўлинг, дейилади мақолада.

“10-рақамдаги Абдухолиқов аниқ позиция танлайди ҳамда ўнг ва чапни яхши кўра олади. 177 см, 64 кг бўлган ушбу футболчи яхшигина дриблинг ва тезликка эга. Ўзбекистон термасининг даҳшатли кучи, ўнгдаги Яхшибоевдир. У терманинг қасри! Индивидуал маҳорати жуда кучли. Чапдаги, бўй-басти унча баланд бўлмаган Қодирқулов эса кутилмаган тезлик ва дриблингга эга. Ушбу учликнинг майдондаги посициясини ўзгартира олсаккина, мақсадга эришамиз”.

Мақолада терма жамоа бош мураббийи Ким Хак Боумнинг фикрлари ҳам келтирилган. У: “Биринчи ёки иккинчи ўрин унчалик муҳим эмас, лекин Сиз қирол бўлсангиз, биринчи ўринда чиқишингиз керак. Агар буни уддаласак, кейинги босқичда “D” гуруҳидан иккинчи ўринда чиққан жамоа билан ўйнаймиз ва кучимизни тежаймиз. Бунинг учун биз Ўзбекистон термаси билан қатъий ва бор кучимиз билан ўйнаймиз”, деди.

Шунингдек, журналист дарвозабон Абдувоҳид Неъматовнинг ҳаракатларини ҳам таҳлил қилган. “Ўзбекистоннинг Ахиллеси - бу дарвозабони. Абдувоҳид жамоанинг энг ёш ўйинчиси. У тўпни яхши ушлаб қолади. Бироқ, айрим ҳолларда тажрибаси етарли эмаслиги кўриниб қолмоқда”.

Раҳмиддин Шерматов
Жанубий Корея, Тегу шаҳри.
2020 йил 14 январь.