БАА пойтахти Абу Дабида ўқув-машғулот олиб бораётган “Локомотив” бугун иккинчи ўртоқлик учрашувини ўтказади.

Хабарингиз бор, дастлабки назорат баҳси Шотландиянинг “Глазго Рейнжерс” клуби билан кечди. Эртанги ўйин Хитой Суперлигаси вакили “Жиангсу Сунинг” клубига қарши бўлиб ўтади.

“Dubai Cultural Sports Club” стадионида бўладиган учрашув маҳаллий вақт билан 16:30 (Тошкент вақти 17:30)да бошланади. Қуйида “темирйўлчилар”нинг ушбу рақиби ҳақида баъзи маълумотларни келтириб ўтамиз.

- “Жиангсу Сунинг” 1958-йилда ташкил топган бўлиб, 1994-йилдан бери профессионал футбол клуб мақомида фаолият юритиб келяпти.

- 2015-йил “Форбес” журнали берган маълумотга кўра, “Жиангсу” Хитойнинг энг бой клублари қаторида тўртинчи ўринни эгаллаган. Ўшанда футбол клуб 144 миллион долларга баҳоланган.

- Ушбу жамоа ўтган мавсумни ўз чемпионатида 4-ўринда тугатди. Жамоа 30та ўйиннинг 15тасида зафар қучиб, 8 бор дуранг ўйнади ва 7та беллашувда мағлуб бўлди.

- “Жиангсу” таркибида бразилиялик Миранда (олдин “Атлетико” ва “Интер”да ўйнаган), Алекс Тейшейра (аввалги жамоаси “Шахтёр”), италиялик ҳужумчи Эдер (аввалги жамоаси “Интер”), хорватиялик Иван Сантини (аввалги жамоаси “Андерлехт”) каби легионерлар бор.

- Жамоа бош мураббийи руминиялик Космин Олариу ҳисобланади. Ушбу мутахассис 2007-йилдан бери Осиёда ишлаб келяпти ва кўпчиликка яхши маълум.

- Космин Олариу 2018-йил “Жиангсу Сунинг” бош мураббийи этиб тайинланган. Бунгача у “Ал-Ҳилол”, “Ас-Садд”, “Ал-Айн”, “Шабаб Ал-Аҳли” клублари ҳамда Саудия Арабистони миллий терма жамоасини бошқарган.