Англиянинг «Манчестер Юнайтед» клуби бош мураббийи Оле-Гуннар Сульшер АПЛ доирасида «Ливерпуль» клубига қарши учрашувдан олдинги фикрлари билан ўртоқлашди.
Сульшер яқин келажакда албатта чемпионлик учун кураш олиб боришини айтиб ўтди.
«Юрген Клоппнинг биздаги ўйин услуби зерикарли эканини айтганини ҳақорат деб қабул қилмайман. Мен германиялик мутахассиснинг бу фикрларини илтифот сифатида қабул қилишим керак, чунки, бу ҳимояда ажойиб ўйин намойиш этаётганлигимизни исботлайди. Рақиб жамоанинг мураббийи ғазабланаётган пайтда, сиз ўз жамоангиз ўйинларига позитив руҳ олиб киришингиз керак.
«Ман Юнайтед» АПЛ ғолиблигини қўлга киритиш учун барча ишларни қилмоқда. Жорий мавсум биз учун жиддий дарс бўлади. Биз “Ливерпуль” сингари 24 йил совринсиз юра олмаймиз. Тез орада биз албатта юқори чўққига қайтамиз», — деди Сульшер.